有，點會冇呀，當年韓戰咁大件事，同全個世界都有關。講起香港同韓戰，阿史點可能唔提「霍老」霍英東？霍英東一直被指係靠於韓戰期間，即係中國被聯合國制裁禁運嘅時候「走私」物資返內地而發跡。對於呢件事，霍老生前都好少提起，不過查實佢係有同傳媒講起過呢件事嘅，阿史近排搵資料時咁啱見到，不妨又同大家分享吓。

報道話，1950年韓戰爆發，聯合國對國內實施禁運，由於香港當時係英國殖民地，故此亦都一齊加入禁運行列；當年嘅霍英東已經有十幾架船同一間修船廠，船嘅數量喺當年的確數一數二，霍英東自己亦話：「當時全香港大概只有我有這麼多船。所以他們找上了我，要求我用船把那些物資運到內地。我只是負責運輸。」

對於走私指控，霍英東有自己一番睇法，佢話當時所做並不存在「走私漏稅」，因為「禁運」只係嗰個時期嘅「特殊政策同條例」，香港本身一直都係一個「自由港」，一直容許貨物自由進出咁話。

點都好，霍英東當年公然挑戰港英殖民政府，事後點會冇後果吖，至於霍老係點樣畀英國人打壓，阿史記得之前都已經講過，之後有機會再講。

除咗霍英東外，香港同韓戰其實仲有關係架。阿史搵到歷史學者劉智鵬嘅文章，佢話1950年韓戰期間，香港作為英國殖民地，嚴格控制出口戰爭物資去中國。正如霍老所講，禁運前，香港係中國入口外國貨物嘅「中介」，中國亦係本地航運業嘅主要貿易對象。

而另一方面，香港亦依靠中國供應食品，例如牲畜同乾貨等，喺1938年香港與中國嘅貿易佔香港貿易總額達到40%，但係去到禁運嘅時候，相關份額就急跌到只有20%，劉智鵬好清楚指出，分析完政府數據後，證明當年「禁運」對香港經濟同市民生活都造成嚴重打擊。

圖片：中國政府網