以前電腦單機遊戲年代,阿史都幾鍾意一隻叫《幽城幻劍錄》嘅台灣遊戲,仲帶阿史認識左「樓蘭」呢個地方。樓蘭係古代西域小國,位於今日嘅新疆羅布泊一帶,歷史記載早見於《史記·大宛列傳》,入面記載樓蘭「邑有城郭,臨鹽澤」。由於樓蘭地處絲綢之路嘅貿易樞紐,長時間被夾响漢朝同匈奴兩股勢力之間做牆頭草,所以歷史上漢朝都多次派兵攻打樓蘭。《漢書·西域傳》更記載公元前77年漢使刺殺樓蘭王,將樓蘭改名鄯善國。

公元4世紀左右,樓蘭嘅歷史就驟然中斷,唐朝時該地更係「城郭巍然,人煙斷絕」。而樓蘭滅亡原因至今仲係無定案,但普遍傾向於氣候同環境變化嘅因素。直到1900年,瑞典探險家斯文·赫定响維吾爾族向導嘅帶領之下,終於响羅布泊附近發現左樓蘭古城嘅遺址,之後呢個被探險家喻為「東方龐貝」嘅古城就不斷有大量文物出土,包括「樓蘭女屍」。依家樓蘭古城係一個要經政府審批先可以入嘅景區,比錢都唔係隨便入得,不過要睇樓蘭文物嘅話都可以去新疆博物館。