以前讀中史個陣，都知道昔日中國海上絲綢之路係由中國東南沿岸為起點，中外商旅通過海路出出入入做貿易生意，原來其中一個地方唔係離香港好遠，就係廣州市。

响廣州市黃埔區，有一間南海神廟，呢間廟建於隋朝開皇年間，至今已經有1400多年歷史。據講古時每年都有官員代表皇帝到該廟祭奠南海神洪聖爺，商船、漁船出海，亦向南海神祭拜，祈求一帆風順、平安大吉。亦因為呢個地方係古代出海出洋，所以就被譽為海上絲路始發地之一。

至於呢間廟有另一個更多人認識嘅名字，就係菠蘿廟。相傳唐朝時印度波羅王國派使者嚟朝貢，一個隨行官員到咗廣州一帶，見風景太靚竟然玩到唔記得時間上船，結果呢位南亞官員就留咗响廣東，日日舉起隻左手望海，望下有無船接佢返去，可惜最後都係等唔到，死咗响中國。當地人為咗紀念呢位番邦朋友，於是就安放喺南海神廟供奉，南海神廟就有咗波羅廟呢個名，後嚟寫寫下就寫咗「菠蘿廟」。其實當中嘅波羅係指波羅王國，而唔係食得嘅菠蘿。