白求恩呢個名，喺香港甚至係佢嘅故鄉加拿大都唔係好多人識，不過，佢曾經喺中國抗日戰爭裡面作出巨大貢獻，甚至為此犧牲。

白求恩全名Henry Norman Bethune，原本係加拿大嘅外科醫生，佢曾經加入加拿大皇家海軍做軍醫，參與過第一次世界大戰嘅救援工作。1926年，白求恩患上肺結核，佢採用咗當時尚未成熟嘅「人工氣胸療法」嚟醫好呢個難癒嘅病，仲因此發明咗「白求恩肋骨剪」等一系列胸外科手術器械，完善咗「人工氣胸療法」。此後，白求恩埋頭研究胸外科手術，仲成日為貧民免費贈醫施藥，又號召同行一齊救治窮人，等窮人都可以得到完善嘅醫療服務。可惜，佢嘅一切努力都得唔到重視。

之後，白求恩輾轉去咗西班牙，佢仲發明咗世界上第一種運輸血液嘅方法，同埋建立咗流動捐血站嘅雛形。1937年，白求恩遇到中國教育家陶行知，得知中國啱啱經歷咗七七事變，正展開抗日戰爭。次年，白求恩就義不容辭咁去咗中國，走上前線做戰地醫生。白求恩除咗喺戰場救死扶傷之外，仲致力於編寫醫療圖解手冊、製作各種醫療器材、訓練護理人員等，以降低傷員嘅死亡率同殘廢率。

白求恩雖然醫術高明，但佢脾氣暴躁、性情古怪，遇到救護人員擅離職守、醫療器械擺放嘅位置唔啱、消毒工具唔達標等，都會大發脾氣，將刀同剪全部丟落地下。但轉過頭，對住傷者，白求恩又會即刻變臉，異常溫柔。有次白求恩做緊手術，遇到日軍逼近，哨兵催促白求恩儘快撤離，白求恩加快咗手術速度，期間不慎被碎骨刺傷手指，佢只係將手指浸落消毒液度粗略處理，堅持做完手術先撤退。而呢個小傷口未經過妥善處理，又再次裂開，喺為另一名傷者做手術果陣被細菌感染，令佢患上敗血症。白求恩嘅病情惡化得好快，最後喺1939年今日去世。

圖為白求恩幫傷員做手術嘅情形。網絡圖片