白兔糖係唔少香港人嘅童年回憶,上次講開粒糖嘅小故事,今日就同大家介紹下佢個生產商——上海冠生園。冠生園由商人冼冠生創立,佢出身於佛山一個裁縫家庭,因年幼喪父、屋企經濟環境唔好,15歲就跟住親戚去上海一間叫「竹生居」嘅宵夜鋪度做學徒。冼冠生好勤力,好快就掌握製造各種食品嘅手藝,出師之後試過幾次自己開餐館,但都以失敗告終。後嚟,上海開始流行去戲院睇演出,小販就喺戲院出面兜售小食,冼冠生靈機一動,自設食品手作坊,同太太主要整啲陳皮梅、牛肉乾嚟賣。由於冼冠生嘅零食價廉物美,好受顧客歡迎,漸漸有咗名氣。

直到冼冠生喺報紙見到香港食品店「冠生園」執笠,佢覺得「冠生園」相當吉利,就用咗呢個名嚟同人夾份開鋪。由於冼冠生當時手頭上無乜錢,只係用咗500蚊入股,就係呢500蚊,冼冠生嘅冠生園後嚟喺全家開咗20幾間分店。1915年,冠生園喺上海開業,憑住冼家嘅努力,好快上咗軌道。三年之後,冠生園就已經由合夥手作坊變成有限公司,冼冠生仲做埋公司嘅董事同總經理。冠生園以生產經營糖果、蜜餞同各類糕點食品為主,佢參考日本糖果,研發出杏華軟糖同魚皮花生等,同樣好賣得。

三十年代,冼冠生請咗爆紅嘅影星胡蝶為月餅做宣傳,啲海報貼到周街都係,令佢得到「月餅大王」嘅稱號。短短幾年間,冠生園就成為上海響噹噹嘅食品公司,分店仲開到去南京、武漢、成都、昆明等城市。

圖片嚟自網絡。