以前女仔出嚟做嘢已經好少見，做埋官簡直係超級罕有，而袁曉園就係一個咁嘅奇女子。
袁曉園又名袁行潔，出生喺官宦世家，有唔少家庭成員在朝為官。袁家亦係書香世家，台灣知名小說家瓊瑤就係袁曉園堂妹嘅女兒。耳濡目染之下，袁曉園自細就能夠吟詩詞、習書畫。不過屋企嘅私塾老師都係為佢兩個弟弟請嘅，袁曉園只可以偷聽老師講書。袁曉園18歲果年，受五四運動爆發影響，佢離開咗屋企，考上咗江蘇省農礦廳廳長嘅秘書一職。不過，袁曉園並未滿足於女秘書一職，後嚟佢有機會去法國留學，途中仲識咗後嚟嘅老公葉南。去咗法國之後，袁曉園靠幫大使館抄寫文件、幫華僑代寫書信嚟賺錢，攻讀普魯士大學嘅政治經濟學。
學成回國之後，袁曉園成為中國第一任女稅務官，佢堅持清廉從政、嚴格按章辦事，雖然幫稅局填補咗好多漏洞，但亦引起好多人不滿。喺稅局做咗一年，袁曉園迫不得已辭職，再度前往法國留學。袁曉園再次回國之後，被外交部委派去印度加爾各答領事館任副領事，成為中國首位女外交官。喺佢任領事嘅6年間，正值國內抗日戰爭，袁曉園不遺餘力到處動員華僑捐款並購買軍火運返中國。每當遇上當地政府扣押軍用物資嘅時候，袁曉園就用強硬嘅外交手段交涉，令對方折服。袁曉園後嚟回憶返果段日子，話當地政府曾經有好多人喺背地裡議論自己，話自己好惡。
袁曉園除咗係一位出色嘅外交官，佢仲參與過中國嘅文字改革，提出漢字現代化方案，創立「袁氏拼音漢字字母」。
圖片嚟自網絡