經過彩虹站嘅史友照理都會發現地鐵站內都有七隻唔同嘅顏色，假如各位進一步深入彩虹，入到彩虹邨，更加會發現有個好特別嘅設計，就係連入面嘅路都係以彩虹顏色命名！外界仲話彩虹村係風水寶地，據講煮鮑魚出名嘅楊貫一、藝人謝君豪同劉以達等都曾經住過添。

彩虹邨入面嘅幾條路分別係紅梅路、橙花路、黃菊路、綠柳路、青楊路、藍鐘路同埋紫葳路，連邨入面嘅樓宇都係用唔同顏色做字首，好似金華樓、綠晶樓、丹鳳樓、紫薇樓等，雖然唔係彩虹七色，不過都心思十足。

話說彩虹邨係香港最早期興建嘅公共房屋之一，於1964年落成，係當時最大嘅公共屋邨，可以住到超過四萬個居民。邨內建築融入包浩斯風格元素，仲為香港拎咗1965年香港建築師學會銀牌獎，真係幾威水下。彩虹邨响六十年代接待過唔少外國貴賓，包括1964年仲未係美國總統嘅尼克遜、1966年嘅英國瑪嘉烈公主等。

到咗今時今日，彩虹村憑住獨特外觀，成為年輕男女嘅打卡勝地，阿史週末去到，十個有八個都影相打卡或者幫靚女影相打卡。不過影還影，記得唔好打擾居民生活呀~

圖二及圖三分別係尼克遜同彩虹邨居民打波，以及瑪嘉烈探訪居民嘅情形。圖片嚟自房屋署網站。
註：俯瞰圖由香港政府檔案處提供，如需使用是項相片，須以書面向香港政府檔案處提出申請