肥肥地、面容慈祥嘅王天林除咗係王晶嘅爸爸，亦都係一個演員，更加係出色嘅導演。喺8年前嘅11月16日，王天林逝世，係影視圈同觀眾嘅一大損失。

王天林1928年生於上海，17歲時到香港生活，由叔父王鵬翼帶入影壇工作，起初做過沖印、錄音、場記、助導等工作。喺1950年，22歲嘅王天林得到洪金寶祖父洪沖豪嘅賞識，執導第一部作品《峨眉飛劍俠》，成績不俗。王天林之後喺50年代中期，加入「電懋」拍電影，作品包括經典歌舞片《野玫瑰之戀》同《教我如何不想她》等。

70年代初電懋結業，王天林就去咗無綫電視監製，作品有《書劍恩仇錄》、《京華春夢》、《萬水千山總是情》、《小李飛刀》等經典劇集。1976年拍《書劍》時，佢引入咗部份電影製作嘅方法，好似吊威也等，對當時嘅無綫嚟講非常新鮮。

王天林其中一個徒弟係香港導演杜琪峰，佢哋喺無線認識，杜琪峰講過，唔係王天林嘅話，自己得中三學歷，做唔到導演，「佢唔止係我師父，都係我半個老竇。」而王天林經常拍杜琪峰嘅戲，扮演唔同角色，據講佢通常都係收利是做片酬。話說有次過年，王天林客串咗七日戲，杜琪峰封咗88,888嘅大利是過佢，認真豪氣。去到後期，王天林依然參演唔少電影，好似《精裝追女仔》、《瘦身男女》、《嚦咕嚦咕新年財》、《黑社會》、《金錢帝國》等電影。

圖片嚟自網絡。