中國首名太空人楊利偉遨遊太空之後,繼續有其他太空人乘坐火箭升空。太空人劉洋喺2012年6月跟埋同伴景海鵬、劉旺,一齊乘坐神舟9號太空船升空執行任務,成為中國第一位執行航天任務嘅女太空人。佢返落地球之後,話雖然小學時已經知道地球係圓嘅,但係親眼喺太空見到地球孤度時,個感覺完全唔同。而對於自己成為中國第一個上太空嘅女性,佢覺得相當幸運。

劉洋喺1997年成為空軍女飛行員,做咗大約13年飛行員之後,佢參加咗中國喺2009年首次招募女航天員,第二年喺北京接受超過兩年嘅訓練。佢曾經喺做分享嘅時候,形容呢段時間嘅訓練相當刻苦,佢提到做航天員要接受坐喺旋轉凳15分鐘嘅訓練,佢第一次做呢個訓練嘅時候,轉咗5分鐘就頂唔順,之後仲搞到食唔到嘢。為咗克服難關,佢展開「自轉」訓練,空閒時彎低腰原地轉圈,向左15個圈,向右15個圈,再慢慢加上去。

劉洋每日要接受嘅訓練項目由朝到晚,塞到嘅時間表滿晒咁滯,幾乎每星期都有兩三個考試,而且訓練嘅強度越來越大,唔係個個都頂得順㗎!劉洋透露,喺佢接受訓練期間,父母都曾經患過大病,爸爸更需要入院做手術,但父母為咗唔好令劉洋分心,都選擇咗隱瞞病情,對劉洋嚟講,最後達成上太空嘅夢想,係唔少得父母嘅支持同付出。

太空生活嘅經驗改變咗劉洋嘅諗法,好似喺太空物資緊缺嘅環境下,空氣同水都係由地面帶上去,花費好大嘅代價,令佢更加珍惜僅有資源。因為依個原因,佢當年去完太空之後,第一樣最想做嘅事,係沖返個靚涼。