換心係唔少科幻小說同影視題材嘅情節，其實《聊齋》入面都有相關故事。話說書生朱爾旦同朋友飲酒，被人激兩激之下，深夜走去閻王殿揹咗陸判官嘅雕像。雖然佢後嚟將嗰雕像放返原位，但陸判酒癮起，就親身去咗朱爾旦屋企，兩人就係咁成為酒友，而詭異嘅故事，亦慢慢到戲肉。

有日佢哋兩個飲完酒，朱爾旦覺得五臟六腑痕痕地、痛痛地，一望，幾乎嚇到彈起，佢見到心口位置被陸判劏開，啲腸呀胃呀响對方手中整嚟整去，佢忍唔住問陸判，「平時無咩仇怨，點解殺我？」陸判見緊朱爾旦豬豬地，就解釋話係幫佢換個玲瓏心，換完就會變得文思大進，簡稱醒目啲。

天光後，朱爾旦發現自己過目不忘，後嚟仲响鄉試中攞咗嘅第一名。唔好以為個故事就咁完，人總係貪心，得完一總係想吓二，唔知足嘅朱爾旦居然向陸判提出第二個要求，有機會下次再同大家分享朱爾旦老婆嘅奇遇。

圖片嚟自網絡。