每到周末，中環銅鑼灣一帶都有大批外傭聚集，當中部分係來自菲律賓嘅女傭，成為香港假日嘅一道風景。响香港工作嘅外籍家庭傭工，分擔咗唔少本地家庭嘅家務工作，成為本港社會不可或缺嘅部分。咁香港幾時開始引進菲傭呢？
按立法會文件顯示，香港外籍家庭傭工獲准嚟香港係始於上世紀七十年代。1973年，港英政府准許輸入外傭，以補充本地全職家庭傭工不足嘅情況。當時適逢環球石油危機，菲律賓面對經濟逆境，菲律賓政府响1974年放寬國民前往海外工作，開創菲傭嚟香港工作嘅先河。
據了解，七八十年代嚟香港工作嘅菲傭，大部分菲傭都係當地大學生或擁有大專學歷，能操流利英語，介乎23歲到39歲，有氣有力，所以好受香港僱主歡迎。而隨住香港家庭收入有所增加，對外傭嘅需求亦不斷加大，菲傭來港人數亦不斷增加。1982年在港工作的菲傭人數只有21,500人，到咗1995年已經升至157,000人。現時，全港約有352,000名外傭，其中有189,00人就係來自菲律賓。睇返個數，唔怪得以前有條IQ題係問「星期日邊度最多菲律賓人」。