好多人知道跳水皇后伏明霞嫁咗畀前財爺梁錦松，喺戀情同婚姻背後，阿史帶大家回歸本質，介紹佢更矚目嘅成就——跳水。

伏明霞於1978年8月生於湖北武漢，5歲開始練體操，之後先改練跳水。1991年1月嘅世界錦標賽上，當時中國隊唔少冠軍人馬退役，年輕嘅伏明霞頂住壓力、大放異彩，奪得十米高台跳水金牌，以十二歲之齡成為最年輕嘅世界冠軍，被列入健力士世界紀錄。

伏明霞1992年現身巴塞羅那奧運會，去到最後一跳，佢只落後已經完成比賽嘅第二名選手7分，有旁述話「佢求其跳都贏」，最終伏明霞不負眾望，奪得十米高台跳水金牌，再次打破紀錄，成為最年輕嘅奧運金牌得主。四年後亞特蘭大奧運會，佢唔單止衛冕十米高台跳水女王，更加贏埋三米彈板金牌，成為雙料冠軍，亦都係中國第一個跳水運動員响同屆奧運擸走高台同彈板跳水金牌。2000年悉尼奧運佢再次奪得3米彈板冠軍，仲同隊友郭晶晶奪得雙人3米彈板亞軍。

奧運四金一銀嘅輝煌成績，都唔夠伏明霞嘅戀情矚目，2002年24歲嘅佢同50歲嘅梁錦松閃婚，之後仲生咗三個仔女添。近一兩年，媒體報道佢同鄭秀文齊齊慶祝生日，睇嚟生活得好開心。

原圖嚟自網絡。