「哥哥姐姐可唔可以幫手埋支旗？」去到星期六，好容易會遇到一兩個賣旗嘅小朋友，尤其地鐵站附近，更加係「旗海處處」，好似便利店咁，總有一個喺左近。除咗了解咩機構受惠、張貼紙設計得靚唔靚之外，大家又有無諗過，叫得賣旗賣旗，原來早年捐咗錢真係會收到一面旗？

香港其中一個慈善團體保良局早於1937年已經有類似籌款活動，不過當時唔係賣貼紙或者旗，係賣花。三十年代尾大量難民湧至，保良局希望當局增加撥款，收到對方賣花籌款嘅建議。1939年佢哋第一次賣由婦孺製作嘅紙花，籌到八千蚊。對比返女工每月人工約9蚊，筆善款已經係好大數目。

去到五十年代，保良局嘅紙花分為幾種，包括放置車頭位置嘅「車頭花」。紙花由書紙或皺紙製作，成本日漸上升，所以1957年保良局改為賣旗。有報道話，當時除咗紅色紙旗，仲有布製嘅旗仔。不過旗嘅成本都唔平，所以去到七八十年代，就變成有大頭針嘅紅色雞毛，等善長可以扣落件衫度，而後嚟旗仔再度變身，成為印咗機構名等資料嘅貼紙。

唔單止賣嘅物品由花變咗貼紙，用嚟裝錢嘅容器都唔同咗，由昔日嘅錢箱變成膠袋，以至於可以循環再用嘅布袋，今時今日有部份團體更加收八達通，善長一嘟就可以捐款。講完歷史，話時話大家今日又買咗旗未？

圖為五十年代婦孺製作紙花。圖片嚟自保良局網站