現今大眾嘅居住條件同幾十年前相比，可以話係有翻天覆地嘅變化。發展嘅背後，又點少得創新同改革。之間講過深圳首次「賣地」得到一班香港專業人士嘅幫助，其實除咗深圳外，上海同樣响佢哋嘅幫助之下，展開土地使用制度改革。

當年中國領導層希望借鑑港英政府有期限同有償出讓「土地使用權」嘅做法，不過土地問題屬於政治敏感議題，所以當時並非叫「賣地」，而係稱為「批租」。不過就算改咗名，依然有人因此諗起租界時代，問中國係咪又搞租界？質疑會唔會返返去有地主嘅時代。

國務院1987年7月提出响上海、天津、廣州同深圳試行土地「批租」。為咗寫成批租《辦法》，當時嘅上海市土地局局長蔣如高去咗深圳，聽一聽香港專業人士意見，當中包括現任全國政協副主席梁振英。佢建議上海方面可以排工作組到香港，齊齊寫同改，過程一啲都唔容易。

一切準備就緒後，第二年上海舉行全國首次國際拍賣，批租虹橋其中一幅土地嘅使用權，最後由日籍華商孫忠利以2800萬美元投到，價格遠遠高於預期。究竟點高法？高到大家都叫佢做「瘋子」，可想而知。

圖一前排左二係為孫忠利，圖二係1988年上海土地有償出讓簽約儀式。網絡圖片