汗血馬個名其實叫阿哈爾捷金馬，係中亞國家土庫曼嘅國寶，全球現存嘅汗血馬只係得返3000隻，當中2000隻响土庫曼。而土庫曼嘅國家元首以往亦曾經將汗血馬送過俾英國、法國、俄羅斯、中國等國。而據阿史搵到嘅資料就話，除咗土庫曼，原來俄羅斯、哈薩克、烏茲別克境內都有汗血馬。

可能史友們都聽講汗血馬以前係西域大宛國嘅特產。之但係，有研究就話昔日嘅大宛國並唔係响今日嘅土庫曼，而係响費爾干納盆地一帶，即係依家吉爾吉斯、烏茲別克交界地區。講到汗血馬同中國歷史，最出名就應該係漢武帝為求寶馬大動干戈。當時漢武帝知道大宛國出產汗血馬，本來諗住去買，點知使者被殺，結果漢武帝就派李廣利大宛國攻打大宛，結果大宛戰敗求和，獻上寶馬三千匹。此後，西域國家之後都有向中原政權上貢汗血馬，而好多文學作品提及嘅「天馬」，就係指汗血馬！

講開又講，汗血馬依家嘅市場價格一啲都唔平，新聞就話有個中東油王就用成千萬美金買咗隻汗血馬。嘩！有錢就係任性….

圖片來源：中新網