一個人記錯唔出奇，如果一班人齊齊記錯，會唔會分分鐘變成「事實」？美國一個叫Broome 嘅blogger，2010年話南非國父曼德拉早於1980年代已於獄中逝世，仲信誓旦旦講到腦入面仍然記得報道葬禮嘅片段。依段「認知」有咩特別？在於幾千人同Broome一樣，都同樣擁有曼德拉八十年代就不在人世嘅「記憶」，後嚟大家就稱依種現象為「曼德拉效應」，仲扯到同陰謀論、平行宇宙有關。

網上一啲同「曼德拉效應」有關嘅例子，引起唔少人爭論，好似美國前總統甘廼迪被行刺時，佢坐嗰架車有4個定6個人；卡通人物比卡超條尾嘅末端有無黑色；羅馬數字4係「IV」定係「IIII」等。點解大家嘅記憶有出入？有一種可能性係話，有人先記錯一件事，然後將錯誤嘅資訊以訛傳訛，令唔少人信以為真，時間長咗就變成所謂嘅共同記憶。

响資訊爆炸嘅年代，真係要好好過濾啲資料同判斷真偽。講咗咁耐，其實曼德拉幾時逝世？答案係2013年12月5日，換而言之，曼德拉2010年仍然好地地，佢同年7月仲出席南非世界盃閉幕式添。

圖片嚟自網絡。