80年代尾90年代初，國內外形勢嚴峻，1991年蘇聯解體，冷戰結束，令世界局勢出現大變動，有中國改革開放總設計師之稱嘅鄧小平，正正就係响咁嘅背景下南巡。鄧小平出發前訂下規矩：「不開會、不陪餐、不題詞，不見記者、不照相、不報道」。不過後嚟報道入面，依然睇得到小平講話、搵找到相關內容，到底係咩原因？原來依啲紀錄之所以有得留低，全靠有南巡「首席接待官」之稱嘅陳開枝。

鄧小平當時南下武昌、深圳、珠海同上海等地，發表著名嘅南方談話。講到改革開放時，佢無長篇大論，只係話「改革開放膽子要大一些，敢於試驗，不能像小腳女人一樣。看準了的，就大膽地試，大膽地闖。」陳開枝當時是中共廣東省委副秘書長，全程安排並接待鄧小平南巡。鄧小平視察深圳、珠海等地嘅時刻，陳開枝依然記憶猶新，佢話當年鄧小平參觀皇崗口岸時，於深圳河大橋橋頭嘅邊境上，凝視對面嘅香港土地，「佢（鄧小平）或者係諗緊1997年香港回歸、實行一國兩制嘅大事！」

對於透過錄音拍片留低鄧小平講話嘅歷史時刻，陳開枝透露，係同曾任鄧小平辦公室主任王瑞林爭取返嚟，希望保留一份珍貴紀錄，佢仲拍心口話，「如果有人追究，我孭！」就係咁，相關嘅歷史片段先至獲得保留，大家先至可以從依啲紀錄入面，了解當時發生嘅種種。

圖一為鄧小平南巡，圖二左為陳開枝。網絡圖片