鹹海係中亞地區嘅一個鹹水湖，位於哈薩克同烏茲別克嘅交界，水源主要係嚟自阿姆河同錫爾河。蘇俄政府決定興建運河，將阿姆河同錫爾河嘅水引入附近乾旱地區，令個啲地區成為棉花同水稻種植基地。就係咁，阿姆河同錫爾河超過八成嘅水就流入咗乾旱區，呢個引水工程不但無令乾旱地區帶來氣候改變同令耕地被嚴重污染，鹹海亦因為無水流入而開始有水位下降情況。而鹹海嘅面積亦由六十年代嘅6.4萬平方公里，大減至1993年嘅3.47萬平方公里，到咗2003年就到分咗東西兩邊，乾涸見底嘅面積不斷擴大，一個內陸鹹水湖，結果變成沙漠地區，呢個就係鹹海危機。

鹹海乾涸帶嚟咗嚴重嘅生態災難。鹹海周邊地區一帶氣候因為鹹海乾涸而劇烈變化，唔單止令當地唔少生物滅絕，同時令氣候大變，極端天氣出現，降雨量大減，旱災頻頻。另外，鹹海露出大面積湖底，風把鹽份同有毒物質吹到人群聚居地區，為鹹海地區居民帶嚟嚴重嘅健康問題。

聯合國秘書長潘基文曾經講過，鹹海危機係21世紀最嚴重嘅生態災難。其實早响蘇俄年代，蘇聯已經有拯救鹹海計劃，但係計劃因為蘇聯解體而無疾而終。由於鹹海位於哈薩克同烏茲別克交界，拯救計劃就落入呢兩個國家身上。相對而言，哈薩克响呢方面就較為積極，當地政府响鹹海北部起咗堤壩，減少水份流失，成功將北鹹海水位提升。但烏茲別克就因為國內財政緊拙，令拯救步履緩慢。另一個問題係鹹海主要水源來自阿姆河同錫爾河，呢兩條分別流經幾個中亞國家，各國都需要水資源，可以流入鹹海嘅水量就更難保證。而拯救鹹海可能遇到最大問題，就係各國响鹹海進行石油同天然氣嘅開採，所以有評論就話當地政府為咗經濟利益可能唔係太想將鹹海回復舊貌。

依家好多人成日講「一帶一路」，阿史就覺得要對「一帶一路」國家同地區嘅歷史同現況首先有一定嘅認識，呢個就係阿史簡述鹹海危機嘅原因。