早排介紹過京劇大師梅蘭芳同上海教父杜月笙,唔差在講埋「梨園冬皇」孟小冬。黎明早年主演嘅《梅蘭芳》令大家對由章子怡飾演嘅孟小冬多咗一份好奇,特別係佢同梅蘭芳以及杜月笙之間嘅感情瓜葛。其實除咗感情生活,孟小冬嘅京劇造詣同樣引人注目,得到「梨園冬皇」美譽。

孟小冬生於梨園世家,拜京劇老生(中老年男性角色)首席余叔岩為師,被公認係余派嘅主要傳人。1926年,孟小冬同梅蘭芳合演一齣《游龍戲鳳》,孟小冬女扮男裝飾演皇帝,梅蘭芳男扮女裝飾演李鳳。唔少人認為佢哋一個係老生之皇,一個係旦角之王,可以話係絕配。第二年,兩人真係拉埋天窗,不過當時梅蘭芳已經有老婆。同《游龍戲鳳》嘅大團圓結局唔同,孟小冬同梅蘭芳無法白頭偕老,幾年後分手收場。

至於杜月笙,佢個仔話爸爸一早已經認識梅蘭芳同孟小冬。孟小冬台上英氣,台下難掩天生麗質,自然有唔少人中意。後嚟孟小冬1949年同杜月笙去咗香港,一年後兩人結為夫婦,孟小冬徹底退下舞台。移居台北後,孟小冬於1977年逝世,終年69歲。

原圖嚟自網絡。