之前介紹過嘅都係中亞國家嘅歷史,即係所謂「新亞歐大陸橋經濟走廊」,阿史今次就轉一轉,介紹一下「中蒙俄經濟走廊」個邊嘅故事。

响俄羅斯西伯利亞地區,有一個世界最大嘅淡水湖,叫貝加爾湖,亦有「西伯利亞明珠」之稱。呢個湖曾經係外族匈奴、鮮卑、突厥等所屬部族嘅領地,以前漢人叫做北海,蘇武牧羊故事嘅北海,就係貝加爾湖喇!歷史上,响貝加爾湖畔生活嘅遊牧民族,同中原政權時戰時和。到咗十三世紀,就成為咗蒙古嘅領土,直到十七世紀先俾沙俄佔領。康熙時清朝同俄國簽訂的《尼布楚條約》,就承認貝加爾湖以東地區屬於俄國。

阿史提過嘅鹹海,竟然又關貝加爾湖事!據講蘇聯當年想起條運河將貝加爾湖嘅淡水輸去鹹海,最後當然無咗下文。不過,中國提出「一帶一路」戰略後,就有建議中俄兩國嚟個北水南調,將貝加爾湖嘅水輸往中國華北地區,解決華北同內蒙古水資源不足問題,甚至有建議話將湖水引入新疆,令本來嘅沙漠變塞外江南。不過咁,呢啲都係建議,兩國政府好似仲未有具體諗法。

圖片來源:網絡