相信大家都知，深圳係一個近幾十年先發展起來嘅一線城市，深圳發展之初，連電都唔夠用，直至沙角B電廠出現。

沙角B電廠雖然喺深圳福田註冊，但佢就坐落喺東莞虎門。深圳作為經濟特區發展初期，因為當地無發電廠，全靠廣東省嘅大電網供電，但大電網每日只可以供到深圳總用電量嘅七成。電力短缺下，深圳嘅工廠每個星期只可以開五日工，咁樣嘅情況下，唔單止無法大量吸引外資，連已經入嚟深圳投資嘅外資都好難有經濟效益。有見及此，香港合和實業有限公司嘅總經理胡應湘同副總經理何炳章就提出，以BOT模式同深圳市合作興建發電廠。

所謂BOT，即係Build、Operate同Transfer嘅縮寫，係國際上逐漸興起嘅基礎設施建設融資模式。於是，喺1984年，深圳市政府同香港合和共同成立咗深圳沙角火力發電廠有限公司，合和主要負責籌集資金、興建發電廠同之後嘅經營管理，而深圳方面就負責提供土地、購買60%以上嘅電力。不過，呢個計劃上報俾國務院之後，遲遲未見批示。加上呢嘅項目係改革開放以來中國第一個採用BOT模式合作嘅，中間遇到唔少難題，咁樣一拖就拖咗差唔多成年先落實。

最後，沙角B電廠只係用咗短短22個月時間興建就可以發電，並隨即開始供電，可以話係打破咗世界紀錄，輸電量接近廣東電網嘅四分之一，大大舒緩深圳甚至廣東省嘅用電壓力，仲贏埋1988年嘅英國建築獎。胡應湘形容，呢個項目係佢最大嘅成就。

圖片嚟自深圳能源官網。