一講到以前嘅海上絲綢之路,阿史就諗起明代三保太監下西洋嘅故事,當然,海上絲綢之路唔係明代先有,只係明代係呢條經濟交通路線發展到鼎盛時期。當時鄭和嘅船隊去到非洲東岸,以當時航海技術而言其實好勁。據記載,船隊下西洋時竟然搵到傳說中嘅瑞獸麒麟。

麒麟係古代傳說嘅生物,係吉祥嘅象徵性,相傳麒麟出現,麒麟太平盛世才能見到。不過傳說還傳說,根本就無人見過。之但係鄭和下西洋之後,唔少蕃邦國家就派船隊向明朝呢個大國朝貢,其中一個叫榜葛剌嘅國家就進貢咗隻麒麟。嗱!阿史唔係吹水,據《明史‧成袓本紀》所載:「榜葛剌貢麒麟。」一年之後,另一個國家麻林地又進貢咗隻麒麟。榜葛剌就係今日嘅孟加拉,麻林地就係今日嘅肯尼亞東岸。據講,當麒麟响北京出現,明成袓大悅。

其實,明成袓見到呢隻麒麟,係一隻長頸鹿。不過,長頸鹿明明係非洲生活嘅動物,點會先由榜葛剌進貢俾明朝呢?有學者研究指榜葛剌同當時阿拉伯地區國家商貿頻繁,明朝艦隊下西洋之後各國都爭相進貢,所以榜葛剌投中國人所好從非洲運隻長頸鹿返嚟一啲都唔奇。