阿拉伯嘅大航海時代？

之前阿史講咗下明初個陣有蕃邦進貢左隻麒麟去中國，有史友就話當時嘅中國航海技術係世界最先進國家之一。的確，唔止明代，其實早响唐宋時期當時中國就同其他國家有好多海路嘅交流，其中一個就係阿拉伯地區。

其實早响漢代，中國已經有同阿拉伯一帶國家嘅往來，最著名就係班超派甘英出使大秦，但佢去到安息國嘅西海，即係今日嘅波斯灣就返咗轉頭。其實，安息國一直係羅馬帝國通往中國絲綢之路嘅中轉站，咁就好易明白以前中東一帶同中原地區商貿往來係幾頻繁。到咗唐宋時代，兩地海上往來就更為發達。

實際上，中東臨近波斯灣、紅海同印度洋，所以呢個地區嘅航海技術曾幾何時係相當發達。好似當地海員在長期航行經驗，研究出印度洋上季候風吹向，所以阿拉伯海上商旅就識得利用季候風往返印度同東南亞地區。除此之外，當然唔少得就係阿拉伯帆船(Dhow)。玩過大航海時代嘅史友都知，呢款船速度高轉向力強貨量大，而現實中呢款船即使响逆風環境都可以航行。有趣嘅係，鄭和嘅寶船隊就係借咗阿拉伯人嘅幫助，成功去到東非沿海。而第一個從歐洲航行到印度嘅探險家達伽馬，响東非個陣僱用咗個阿拉伯人做航海士，經佢指點後直接從東非穿過印度洋直達印度。