百幾年前,一個出身普通嘅華人點樣憑住自己嘅努力做到貴族?或者大家可以參考第一個成為夏威夷貴族嘅華人——陳芳。 

陳芳生於現今珠海嘅農民家族,喺佢19歲啱啱喺京城考完科舉返鄉下途中,路經澳門,就喺開雜貨店嘅伯父屋企小住。陳芳見到啲洋人輪船每日不斷出入澳門碼頭,就萌生咗坐輪船去外國賺錢嘅念頭,佢伯父好支持佢,不過就要佢學好英文先。陳芳講得出做得到,真係好認真咁學英文。1849年,已經移居香港嘅伯父,想運一船中國貨物去檀香山賣,要陳芳同行,於是24歲嘅陳芳出發去夏威夷。

位伯父無幾耐就返咗中國,而陳芳就繼續留喺夏威夷,開咗間雜貨鋪嚟賣伯父留低嘅中國貨物。因為啲貨好受當地人歡迎,陳芳因此賺到第一桶金。1851年,陳芳再同同鄉合夥開辦雜貨鋪「芳植記」,採用「開架售貨、自由選購」嘅買賣新模式,仲提供送貨上門服務。1855年,陳芳開始經營蔗糖業,趁住美國南北戰爭,南方切斷北方蔗糖供應嘅時機,陳芳大量傾銷蔗糖到北方,賺到盆滿缽滿,成為夏威夷嘅「蔗糖王子」。

呢個時候,陳芳嘅名望喺當地已經相當高,亦成功打入上流社會,仲娶咗夏威夷公主朱麗亞為妻,成為夏威夷王室嘅貴族。陳芳嘅生意發展一帆風順,亦有興趣參政。咁啱朱麗亞嘅細佬被推舉為王位候選人,陳芳於是出鉅資資助舅仔,令對方如願做咗國王,陳芳兩年後亦成為夏威夷樞密院嘅顧問,名副其實嘅名利雙收。

圖為陳芳及朱麗亞。網上圖片