阿史留意烏克蘭呢個國家，除咗舒夫真高之外，就係克里米亞問題。

克里米亞位處黑海地區，1783年俾俄國吞併咗，之後一直都係俄國領土嘅一部分。直到1954年，前蘇聯領袖赫魯曉夫將克里米亞劃歸為當時為蘇聯加盟共和國之一嘅烏克蘭。到咗1991年，蘇聯解體之後，烏克蘭宣佈獨立，克里米亞亦屬於烏克蘭一部分。不過，1992年個陣克里米亞曾短暫宣布獨立，但隨後與烏克蘭達成協議，成為烏克蘭內自治共和國。

問題嚟喇！响克里米亞裡面，俄羅斯人反而係佔多數，當地民眾嘅政治立場都比較傾向支持俄羅斯，更希望可以脫離烏克蘭，成為俄羅斯嘅一部分。對於俄羅斯而言，如果能夠將克里米亞納入國家版圖之內就最好不過。因為克里米亞本身極具戰略價值，而俄羅斯嘅黑海艦隊就係泊响克里米亞西南岸。最後，俄羅斯响兩年前趁烏克蘭政局動盪派兵到克里米亞，其後克里米亞透過公投宣布脫離烏克蘭，加入俄羅斯聯邦，但呢個公投未獲烏克蘭同國際社會所承認，歐盟更多次呼籲聯合國成員國一齊制裁俄羅斯。

所以唔難睇得出，克里米亞問題其實係影響咗黑海地區嘅局勢。如果有香港人有興趣去烏克蘭交流或者發展，可能真係要留意下呢個地區問題。