2018年即將過去,又係時候做一做總結。今年最傷心嘅,莫過於唔少嚟自科學界、文學界、政商界等嘅名人逝世,今日一於同大家簡單回顧一下佢哋嘅貢獻。

每當仰望星空,都會感歎宇宙嘅無窮同神秘,患有「漸凍症」、撰寫《時間簡史》嘅傳奇物理學家霍金於3月逝世。佢嘅著作提到,人類將來會受唔住誘惑,有錢人可能會利用基因改造技術,創造更聰明嘅「超級人類」,可以話係警世預言。今年另一個隕落嘅科學界巨星,係光纖之父高錕,佢所研發嘅光纖通訊技術,改變世界。

文學界方面,2018年我哋失去幾位大師,國寶級國學泰斗饒宗頤2月逝世,佢對於梵文、甲骨學、敦煌學、方志學等成就超著,對傳揚中華文化貢獻甚大。去到年中,中國意識流小說第一人、香港作家劉以鬯逝世,讀者就算對《酒徒》等作品唔熟悉,都會聽過或睇過由佢作品所啟發嘅電影——名導王家衛嘅《花樣年華》同《2046》。而10月底令無數人傷心歎息嘅,係武俠小說泰斗金庸離大家而去,「飛雪連天射白鹿,笑書神俠倚碧鴛」,佢嘅離世,帶走了一個武俠時代。文壇2018年嘅眼淚,亦為香港才女林燕妮、名嘴李敖嘅逝世而流。

出資興建大批學校嘅慈善家田家炳、新地前主席郭炳湘、微軟共同創辦人保羅艾倫、前聯合國秘書長安南等,同樣於年內逝世,令政商界失去大批傳奇人物。除此以外,通勝專家蔡伯勵;漫威之父史丹李;為巨星柯德莉夏萍設計唔少經典造型嘅時裝傳奇紀梵希Givenchy、品牌Kate Spade同名創辦人亦相繼逝世。無數名人離去,令唔少人流下淚水,除咗銘記佢哋嘅貢獻,亦希望於2019將至之時,大家都能夠活在當下,珍惜眼前人。

原圖嚟自網絡。