克里米亞有一個黑海地區非常出名嘅度假聖地,叫雅爾達。响1945年,呢個地方開咗次好重要嘅會議,後世人稱之為「雅爾達會議」。

1945年2月4日至11日,美國總統羅斯福、英國首相邱吉爾同蘇聯最高領導人史太林响克里米亞嘅雅爾達開會,傾下打贏納粹德國同日本呢兩個軸心國後點樣制定國際新秩序。而响最後,三巨頭達成咗戰後點樣處理德國嘅基本共識,另一樣重要嘅嘢就係戰後會成立一個新嘅國際組織嚟取代國際聯盟,亦即係後嚟嘅聯合國。

講到底,呢個會其實只係美英蘇三個政治上嘅較量,睇下點樣响談判桌上攞到最多嘅利益。好似蘇聯咁,同意出兵日本後可以獲得庫頁島南部、千島群島同中國旅順大連嘅控制權,仲有要蒙古維持獨立狀況。另一個特點處就係中國並無代表參與呢次會議,可能就係因為唔俾中國參加,三國先可以响中國以至亞洲地區攞到著數,特別係蘇聯,可以話係佔盡便宜。而中國權益被盟國出賣之後,無奈焗住同蘇聯簽訂《中蘇友好同盟條約》,允許蒙古公民投票以決定其前途。難聽啲講句,雅爾達會議對中國呢個參戰國而言根本係一種羞辱。