90年代發生過唔少大事，相信當中最重要嘅應該係蘇聯解體呢件事，當中嘅關鍵人物就係當時嘅蘇聯領導人戈爾巴喬夫同俄羅斯總統葉利欽。

喺80年代尾，當時蘇聯出現唔少經濟同社會問題，當時戈爾巴喬夫主張蘇聯改革，措施包括實行總統制、承認多黨制、過渡到市場經濟。作為蘇聯最大加盟共和國嘅俄羅斯，於1991年6月選出葉利欽為俄羅斯首位民選總統。

後來蘇聯發生咗八一九政變，當時戈爾巴喬夫打算係1991年8月20日簽新條約，給予蘇聯15個加盟共和國更多自治權，但喺簽約前1日，蘇共保守派發動政變，將戈爾巴喬夫軟禁喺黑海別墅，葉利欽號召民眾上街，同士兵對峙，結果政變只係維持咗三日，戈爾巴喬夫其後復職，而葉利欽喺事件之後掌握實權，確立佢於俄羅斯嘅政治地位。

葉利欽之後同烏克蘭同白俄羅斯嘅領導人商討脫離蘇聯組成獨立國家聯合體，戈爾巴喬夫眼見大勢已去，喺12月25日宣布辭職，26日起，最高蘇維埃宣佈蘇聯不復存在。

原圖嚟自網絡。