吸毒唔單止傷害自己，仲會害埋其他人！1994年，發生一單同毒品有關嘅劫殺案。當時有兩名分別15歲同20歲嘅青年阿賢同阿寶，狂啪11粒丸仔「十字架」後，頭戴冷帽蒙面闖入元朗屏山西山村一間村屋單位行劫，當時屋入面得80歲蔡婆婆喺度，阿賢同阿寶兩個一個用刀指嚇佢，而另一個就扯斷電話線並且周圍搜掠。

呢個時候，蔡婆婆個孫、住喺隔離屋嘅阿榮見婆婆被人捉住，就奮勇上前同賊人死過，打鬥期間扯甩咗阿賢個冷帽，認出原來賊人就係自己由細認識嘅舊鄰居。蔡婆婆混亂期間，趁機走到村口報警，警方接報趕到，發現阿賢同阿寶已經走咗，而阿榮就身中48刀，倒臥喺血泊之中，雙手雙腳傷口深可見骨，左手更幾乎被斬斷，肝臟亦被刺穿，送院急救，翌日終告不治。警方根據血跡，喺屯門青磚圍一間村屋裡面，搵到阿寶同埋右手受傷嘅阿賢，佢哋承認犯案前啪咗11粒丸仔「十字架」，辯稱自己受到影響導致失控。

最後，阿寶就因誤殺同企圖行劫判監7年，而阿賢就謀殺同企圖行劫罪成，分別被判終身同5年監禁，同期執行，成為廢除死刑之後第1位被判終身監禁嘅少年犯。阿賢入獄之後改過自身，喺2001年會考考獲2B2C嘅成績，2004年法官考慮到心理同精神報告之後，認為佢思想開始成熟，唔會再危害社會，於是就改判佢27年監禁。

原圖取自網絡