東華三院係香港宜家最具規模嘅慈善機構之一，佢嘅成立同位於港島太平山街嘅廣福義祠有密切關係，而東華醫院創院主席梁安亦因為處理義祠事件時盡顯功架，先成為大熱人選。

 所謂嘅義祠其實係華人用嚟安放先僑靈位嘅地方，後來仲成為垂危病人等待死亡嘅居所，呢件事被記者報道之後，隨即引嚟軒然大波。時任港督麥當奴於是決定創建中醫院，以改變當時華人唔信西醫、有病慣咗睇中醫嘅習慣。

1869年，港英政府成立醫院委員會，當時英國仁記洋行嘅資深買辦梁安就係其中一名成員。梁安原本唔係東華創院主席呼聲最高嘅人選，不過因為義祠被揭發有瀕死病人移咗去停放屍體嘅房間，港英政府下令禁止同類事情發生，再犯就當謀殺論。梁安即刻聯同委員會成員上書麥當奴，解釋將瀕死病人移去停屍間係中國傳統風俗，絕對唔係殘暴不仁嘅做法。梁安仲以退出創建中醫院作為威脅，成功令麥當奴撤回禁令，呢件事亦都令梁安脫穎而出，成為東華醫院創院主席。

梁安之後連任咗三屆東華主席，後嚟華北地區遇上百年大旱，佢向本地華商同東南亞華僑籌得巨款，光緒帝下旨將御賜嘅「神威普佑」牌匾贈予東華醫院，以示表彰。

原圖嚟自東華三院官網及網絡。