近幾年，中亞國家成為咗香港人一個新興嘅旅遊地區，中亞一直都係阿史好想去嘅出遊地區，其中一個好想去嘅地方就係撒馬爾罕。烏茲別克嘅舊都撒馬爾罕，有一段好長嘅時期係絲綢之路上貫通東西嘅交通中心，地理位置極具戰略價值。如果上網搵撒馬爾罕嘅相，出現最多嘅應該係雷吉斯坦廣場。雷吉斯坦廣場位於撒馬爾罕市中心，矗立咗三座宏偉壯麗嘅經學院，即烏魯伯格經學院、希爾•多爾經學院以及季里雅•卡利經學院。三座經學院分別建於15世紀至17世紀，係中亞建築嘅經典之作。巨型拱門、湖水藍嘅大穹頂，真係好想親身去望一眼。
講開又講，阿史知道撒馬爾罕呢個城市，又係要多謝「暗榮」，玩過《成吉思汗IV》嘅史友一定知阿史講緊乜。