一家人關係好與壞，在乎溝通與關懷。喺1985年4月發生咗一件家庭慘劇，喺坪洲生活嘅蘇太帶埋5歲同3歲嘅囡囡跳海自殺，警方喺坪洲東灣發現三具屍體嘅時候，見到佢哋腰間被一條紅色碎花布帶綁埋一齊，呈「品」字型堆埋，場面令人心酸。

25歲已經係兩女之母嘅蘇太，街坊話佢待人非常有禮，生活節儉而且樂於助人。曾經有年老嘅鄰居病咗，蘇太陪老鄰居睇中醫，又煲藥俾對方食。而大伯亦認為，蘇太平時生活節儉，本身有積蓄，估計唔係因為經濟問題而諗唔開。

有講法就話，佢老公蘇生份人重男輕女，搞到兩公婆不時嗌交，感情大不如前。而據蘇生嘅講法，老婆失蹤當日朝早，屋企附近山泥塌下，蘇生叫太太齊齊清理但被拒絕，於是兩人又嘈起上嚟，無幾耐蘇太就帶埋兩個女離家出走。蘇生起初以為佢係返娘家住，發現三母女失蹤之後即刻報警。

警方後嚟喺海灘發現蘇太同兩個幼女嘅屍體之後，蘇生情緒激動，企圖自殺，被警方攔住之後，受唔住打擊當場暈低。之後每次有人提起佢老婆同兩個女，蘇生都忍唔住喊，表示相當後悔。

原圖嚟自網絡。