宜家做生意，最緊要梗係度條好橋嚟宣傳自己喇！現代嘅橋王就多到數唔晒喇，但早喺民國時期，上海就已經有個商界奇人，佢就係「蠱惑商人」黃楚九。賣咩賣到咁出名？艾羅補腦汁。

黃楚九生於浙江省余姚縣，係明末清初時期嘅思想家、史學家黃宗羲嘅後人。黃氏家族世代行醫，尤其擅長醫治眼疾，黃楚九嘅父親更加係余姚縣遠近馳名嘅眼科醫生。黃楚九自細耳濡目染，亦學到一身醫術，後嚟去咗上海街頭擺攤賣藥，仲成立咗專治眼疾嘅頤壽堂診所。

黃楚九擅長宣傳自家產品，仲好識得利用各種噱頭添，最出名嘅例子就係艾羅補腦汁。話說補腦汁係根據一份普通安神健腦滋補劑嘅處方炮製，黃楚九捉到當時人喜歡用外國貨嘅心理，用洋人頭像嚟做包裝，標明係「美國艾羅博士（Dr. T.C.Yale）處方」，仲加埋個艾羅嘅虛構親筆簽名同英文說明書。總之，就係將自家藥物扮成係外國貨嚟出售，結果艾羅補腦汁「改頭換面」之後聲名大噪，賣到成巷成市。

點知人怕出名豬怕肥，有個外國人居然話自己係艾羅博士個仔，揚言黃楚九偷咗佢父親嘅秘方嚟賺大錢，威脅要對薄公堂添。依鋪真係老千遇著老千，黃楚九腦筋一轉，索性假戲真做，對外揚言話小艾羅博士到訪上海，借機又宣傳一番艾羅補腦汁。結果，黃楚九只係洗咗幾千蚊「買咗」艾羅補腦汁嘅專利權，唔單止打發走咗個老千，仲更加令人確信補腦汁真係外國配方，營業額大增。計阿史話，响蠱惑嘅商人之中，佢都算得上係高手高手高高手。

原圖嚟自網絡。