六七十年代,總警司葛柏除咗出名貪污之外,亦出名脾氣臭。當時警隊裡面,上司鬧下屬係非常之普遍,而葛柏本身個樣已經夠惡、又大聲,鬧起人上嚟真係好得人驚。葛柏教訓人嗰時,仲要求翻譯員要傳神咁學足佢嘅語氣,有位前警員就分享過葛柏鬧人嘅一件趣事。

話說葛柏出任防暴訓練營營長嘅時候,曾經有位受訓警員無去報到,又無打電話請假,於是就派人去警員屋企睇下咩事,發現佢拐吓拐吓,而佢阿爸就話囝囝訓練嘅時候受咗傷,因為係睇跌打,無睇政府西醫,所以攞唔到醫生紙。對於個警員唔請假就no show,葛柏自然嬲震,就搵人叫個拐拐吓嘅警員第二朝9點去訓練營「照肺」。第二朝,個警員揸住支拐杖走入葛柏辦公室,無「見禮」就坐咗喺梳化上,勁唔識做,而佢爸爸就企咗喺側邊。

當時喺辦公室換緊衫嘅葛柏見到呢個情況,就對住嗰個警員係咁鬧,個爸爸想出聲,結果被葛柏鬧埋一份,連翻譯員都嗌到聲沙。葛柏越鬧越激,仲大吼一聲,個警員驚到彈起,拐杖都唔拎就走咗出去。葛柏鬧走人之後,笑笑口對住翻譯員話,一早知個警員詐病,而第二日呢個警員「迅速痊癒」,如常返去訓練營操練。

原圖取自網絡。