長沙馬王堆漢墓出土嘅女屍及帛書非常有名，面世至今已經有超過40幾年歷史。其實早年考古學家已經確定長沙市郊一帶有漢墓群，但真正發現馬王堆一號漢墓係始於一個意外。1969年，有醫院決定喺馬王堆嘅土冢下挖掘一個大型洞穴，作為戰時傷員嘅救護所。點知越挖落去就越硬，突然之間鑽孔噴出氣體，仲有道火焰飆出嚟，工人認為係「鬼火」，唔敢再施工。究竟墓中嘅女屍及其他文物，如何「浴火」現身？

話說啲工人被所謂嘅「鬼火」嚇親之後，湖南省多個部門嘅電話都響唔停，最後，有人打咗去省博物館，終於揭開謎團。《長沙古物聞見記》仲提過，近世盜墓者曾經於長沙多次遇過墓內噴出火焰嘅「火坑墓」，有講法認為，馬王堆漢墓係其中之一，因為內含沼氣，於鑽探時才燃起火焰。之後湖南省博物館開始發掘，發現咗馬王堆一號漢墓及相關著名文物。

馬王堆漢墓入面嘅女屍唔單止外形完整，佢嘅皮下組織居然仲有彈性，而且腦部組織同內臟器官基本完好。兩千幾年前嘅屍體唔腐化不特止，仲可以保存得咁好，簡直係奇跡。墓內嘅陪葬品仲包括覆蓋喺內棺上嘅彩繪帛書，係中國古代畫中前所未見嘅傑作。其後喺1973年12月長沙馬王堆三號墓出土嘅帛書同竹簡，有成20萬幾字之多，內容涉及戰國至西漢初期嘅政治、軍事、思想、文化同科學等方面，例如《老子》、《周易》等文獻，又有中國最古老嘅天文書、醫書等，堪稱係古代版百科全書。呢批珍貴展品宜家存放喺湖南省博物館，大家有機會去長沙就千其唔好錯過喇。