之前講完民國嘅「鏗鏘玫瑰」鄭毓秀，今日就嚟講吓鄭毓秀嘅外孫女、香港藝人楊盼盼。可能宜家已經好少聽到佢嘅名，不過佢可以話喺唔少70、80後嘅女神，舊年年底佢仲現身《歡樂滿東華》，再次為慈善出力。記得當年楊盼盼飾演穆念慈嗰種癡情、幽怨，簡直演活書入面嘅角色，佢亦憑穆念慈一角迅速紅遍娛樂圈。

除咗有好猛料嘅外公外婆之外，楊盼盼嘅母親亦係昔日上海話劇明星，令楊盼盼唔止識得唱京劇、跳古典舞、寫書法，仲好打得添。楊盼盼4歲開始習武，9歲果陣就已經係喺電影《快劍》入面客串演出。70年代中，楊盼盼加入佳藝電視，隨後再喺TVB拍劇，出演唔少武俠片，代表作有電視劇《書劍恩仇錄》、《倚天屠龍記》、《楚留香》等。

楊盼盼最令人難忘嘅演出，梗係83年版嘅《射鵰英雄傳》，劇入面佢扮演嘅穆念慈命運坎坷、癡戀楊康，一舉手一投足、一個眼神，都係果個內心矛盾重重、鬱鬱而終嘅穆念慈，簡直可以話係完美嘅化身。楊盼盼話佢係根據角色傳統中國女性嘅美嚟演，再加上自小練就嘅京劇表演功底，先演得出穆念慈果種韻味同含蓄美。

楊盼盼喺戲中嘅感情生活無完滿結局，現實中嘅佢情路亦非常坎坷。喺最紅嘅時候，楊盼盼愛上一個有婦之夫，愛得好辛苦，終於等到對方單身，兩人拉埋天窗，但婚姻只係維持咗一年幾就結束。楊盼盼其後獨力撫養女兒，好彩宜家囡囡已經亭亭玉立，仲好孝順添。淡出幕前嘅楊盼盼，喺2004年創立煇煌娛樂，又喺2010年創立電影動作訓練創作室，專門培養武打人才，唔少女星好似文詠珊、周秀娜、朱晨麗、傅穎等都曾經喺果度受訓架。

原圖嚟自網絡。