下個月就踏入豬年喇，一於講講同豬有關嘅歷史先。話說喺2003年，賭王何鴻燊就以約600萬元向美國收藏家買入圓明園十二生肖獸首銅像之一嘅豬首，並轉贈俾保利集團，放喺北京保利藝術博物館展覽。何鴻燊之後再喺2007年，大手筆以6,910萬港元買入馬首銅像，其後亦宣布捐俾國家。

據講，當時馬首係由台灣收藏家擁有，原本諗住拎出嚟以底價8,000萬港元拍賣。何鴻燊知道之後，就直接同賣家傾，當對方知道何鴻燊諗住買入銅像轉贈國家之後，同意取消拍賣，以低於底價賣俾何鴻燊。

十二生肖獸首銅像本身係圓明園海晏堂內、建於乾隆年間嘅十二生肖「水力鐘」報時噴泉。噴泉有12個人身獸首銅像，但喺英法聯軍火燒圓明園嘅時候遭到掠奪。猴首、虎首及牛首早年由保利集團從拍賣行購入，而鼠及兔首由法國皮諾家族於2013年無償歸還予中國，現藏於中國國家博物館，至今仲有龍首、蛇首、雞首、狗首、羊首五個銅像下落不明。舊年年底法國拍賣行被指拍賣龍首，不過從工藝角度及風格上，嗰個「龍首」都被質疑同已經現身嘅獸首有所分別，未必係真。

原圖取自網絡。