明朝「三保太監」鄭和七次下西洋大家就聽得多喇,咁究竟「西洋」具體係邊呢?唔同朝代對「西洋」嘅定義都唔同,明朝時嘅「西洋」係指蘇門答臘島以西嘅北印度洋同附近嘅沿岸地區,包括孟加拉灣、印度半島、阿拉伯海同佢哋嘅沿岸地區,同埋阿拉伯半島、東非海岸一帶。

而鄭和七次下西洋,到過現今嘅柬埔寨、泰國、馬六甲、馬來西亞、蘇門答臘、舊港、孟加拉、斯里蘭卡、馬爾代夫、阿拉伯半島、索馬利亞等幾十個國家同地區。據《明史•鄭和傳》記載,鄭和航海嘅寶船有62艘,最大嘅長約139米,寬56米,可以話係當時世界上最大嘅海船。寶船排水量超過三千噸,載重約二千五百噸,《西洋番國志》中形容它需要百人操作,認真誇張。

除咗裝人嘅船之外,鄭和嘅船隊仲有專門用嚟裝運戰馬嘅遠洋運輸船、儲存糧食淡水嘅糧船、水船同專門裝載士兵嘅戰船。所以,船隊每次嘅規模都相當浩大,出行人數最高峰有成2.7萬人,入面有使節、外交官員、水手、船師、士兵、工匠、醫官、翻譯,以及採辦、觀測天象等各種專業人員,各司其職。

咁大陣仗嘅遠航,無論係裝備、規模等都令唔少國家望塵莫及。至於點解明成祖朱棣會耗費咁大嘅人力物力派鄭和下西洋?除咗係要向他國彰顯明朝嘅富強,促進海內外貿易文化交流之外,仲有一個重要原因,下次再講。

圖為羅嘉良飾演嘅鄭和及鄭和寶船模擬圖,原圖嚟自網絡。