早兩日搭車，旁邊坐咗幾個中學生，討論緊「我的志願」，其中一個話要做醫生，第二個話要做金融兼去IFC返工，第三個就好有諗法咁話，「我要做流浪音樂家！」搞到阿史即刻望住佢哋嘅方向，點知位揹住樂器嘅未來音樂家仲講多句「燕雀安知鴻鵠之志」添，嘩！唔通佢係秦朝末年起義嘅陳勝個friend？

故事是咁的，話說秦始皇死之後，宦官趙高偽造遺詔，逼死太子扶蘇，改立秦始皇嘅細仔胡亥為帝。胡亥昏庸殘暴，上場之後徭役賦稅更重，令百姓苦不堪言，搞到好多人不滿，包括平民陳勝。陳勝又叫陳涉，雖然係農夫，但佢素有大志。《史記·陳涉世家》記載，陳勝早年替人耕田果陣，曾經同一齊種田嘅同伴講，若果他日當中邊個發達，都千其唔好忘記今日一齊捱苦嘅朋友啊！同伴笑佢一個耕田嘅，將來咪又係繼續耕田，何來嘅富貴？陳勝歎息，講咗金句:「燕雀安知鴻鵠之志」，用嚟表達自己不甘於平凡嘅志向。

而後嚟，「金句王」陳勝真係不平凡咗一次。陳勝同貧農出身嘅吳廣一齊被派去戍守漁陽，經過大澤鄉果陣，遇到暴雨，道路被沖毀，無法按期到達漁陽。按照當時嘅律法，條命仔凍過水。陳勝心諗橫死掂又死，不如搏一搏，於是同吳廣殺死押送佢哋嘅軍官，再講咗句金句「王侯將相寧有種乎」，呼籲其他人一齊反暴政。就係咁，喺陳勝、吳廣嘅帶領下，同行人揭竿而起，各地嘅平民亦紛紛響應。之後，陳勝仲自立為王，國號張楚。

圖為陳勝、吳廣起義圖，原圖嚟自網絡。