上次提過鄭和下西洋有幾大陣仗,仲講到明成祖之所以肯花咁多人力物力派鄭和下西洋嘅原因,除咗係要向其他國家彰顯明朝嘅富強,促進海內外貿易文化交流之外,仲可能係為咗尋人。

明成祖想搵嘅,係上一任皇帝兼侄仔朱允炆。話說朱元璋逝世後,皇太孫朱允炆繼位,並展開削藩,上台第一年就先後削去五個親王嘅藩王爵位,引起其餘十幾個親王不滿。次年,當時仲係燕王嘅朱棣以「清君側,靖內難」為名起兵,其後攻陷應天(今南京),自己做咗皇帝,而朱允炆就不知所蹤。

據《明史•鄭和傳》記載:「成祖疑惠帝亡海外,欲蹤跡之,且欲耀兵異域,示中國富強。」故此,朱棣好大機會係懷疑朱允炆逃咗出海外,先特登派心腹鄭和勞師動眾周圍走,秘密搵朱允炆,務求斬草除根,以防佢東山再起。而向外國顯示國力,睇嚟只係順道為之。當然歷來史家對依件事有多種講法,而鄭和下西洋仲有其他目的,例如換取海外珍寶、同外國展開貿易,同埋吸引小國依附大明、朝貢等。

圖為馬德鐘飾演嘅朱棣同陳山聰飾演嘅朱允炆,原圖嚟自網絡。