香港警隊喺1844年正式成立之後第二年，倫敦警察廳警司梅理嚟香港坐鎮，開始招募華人加入警隊。但要過咗超過140年後，警隊先至有首位華人首長出現，而佢就係李君夏喇。李君夏喺1989年接替退休嘅顏理國出任警務處長，做咗5年幾之後退休。

李君夏曾經於英皇書院就讀，其後於1957年加入警隊，1969年升任警司，十年內分別升咗做總警司同助理處長，並喺1989年成為首位華人「一哥」。不過响佢退休前休假未完結之前，就去咗長實及和黃集團做顧問，負責保安事宜，令公務員事務科展開調查，最後禁止佢喺1995年5月至11月期間任職呢份工，而政府之後就收緊要求，規定首長級公務員退休後2年從事有薪工作，都要先知會政府。

過咗呢段「冷河期」之後，李君夏正式加入長和，據稱1996年長和主席李嘉誠長子李澤鉅被賊王張子強綁架，都係聽咗佢嘅意見，最後先令李澤鉅安全獲釋，佢其後又幫李嘉誠組織一隊由「啹喀兵」組成嘅保鏢隊。李君夏2017年1月响寓所內暈倒，送院後不治，終年80歲。

原圖嚟自網絡。