之前講完日本甲級戰犯東條英機及土肥原賢二，今次再講多個佢哋嘅同黨──松井石根。喺1937年12月，松井石根率領日軍攻陷南京，並且指揮日軍展開大屠殺，令超過30萬民眾死亡。當佢喺戰後接受遠東國際軍事法庭受審時，仲狂言呢場戰爭係「愛的戰爭」，係哥哥教訓唔聽話嘅細佬，完全顛倒是非黑白。

喺1937年8月13日淞滬會戰爆發，大約3個月後，上海淪陷，但民國政府堅拒投降、堅持抗戰，竟然激嬲咗松井，加劇佢希望用武力征服中國、攻佔政治中心南京，以及用恐怖威懾方式令中國完全屈服嘅企圖。喺12月5日晚，身為日本華中方面軍司令官嘅松井，指揮軍隊向南京外圍防線展開猛烈攻勢，幾日之內攻陷南京。佢當時縱容日軍燒殺搶掠等暴行，唔少中國人被槍殺、刺死、活埋及強姦，無辜嘅平民被大肆殺戮。

喺1945年日本戰敗之後，松井被盟軍拘捕，並且送上遠東國際軍事法庭。審訊期間，佢依然唔肯承認錯誤，話自己當時病咗，所以無阻止手下嘅暴行，不過軍事法庭舉出例證反駁，證明松井所患疾病並無阻止佢領導及指揮軍隊作戰，加上做出相關惡行嘅軍隊隸屬於松井，所以判決指出松井係知道日軍所做嘅殘忍行徑，判定佢有犯罪責任。松井1948年11月被判處絞刑，同年12月23日伏法。

原圖取自網絡。