之前熱爆嘅電視劇《延禧攻略》用幾乎原班人馬再拍《皓鑭傳》，今晚就開播喇。套劇主要講秦國王子異人遇到金主呂不韋，對方認為異人「奇貨可居」，於是同皓鑭聯手，幫助異人登上王位，成為秦莊襄王。而女主角吳謹言飾演異人嘅夫人、秦始皇媽媽李皓鑭，即係歷史上嘅趙姬。

响真實歷史上，趙姬原本係呂不韋嘅姬妾，根據《史記•呂不韋列傳》記載，話異人响宴會睇中趙姬，呂不韋就獻美女過佢，司馬遷仲提到趙姬大住肚去跟異人，後嚟生咗囝囝政，即係後嚟嘅秦始皇。不過《史記•秦始皇本紀》就話秦始皇係異人個囝，亦無提到趙姬大肚過門嘅情況。除咗史記，仲有其他史料話秦始皇並唔係皇族血統，好似東漢班固嘅《漢書》咁，話趙姬獻畀異人之前已經「有餡」，令到秦始皇嘅身世成為千古謎團。

後嚟做咗秦莊襄王嘅異人駕崩，嬴政繼位，隨住佢日漸長大，《史記》話成為太后嘅趙姬「淫不止」，時時竊私通呂不韋，後尾呂不韋介紹身體某部份異於常人嘅嫪毐過趙姬，啲關係真係亂到一個地步。套劇响內地已經率先開播，有網民就唔滿意套劇好似美化咗趙姬咁，不過仲有咁多集，後續發展要睇過先知。講到依度，可能有人會問嫪毐係邊個？之唔係《尋秦記》入面嘅江華囉。

原圖嚟自網絡。