早兩日lunch討論昔日樂壇組合,有位同事提到花生女郎,話成員包括大家好熟悉嘅女演員張可頤。秘書妹妹Google咗兩吓問,九十年代初佢唔係未選港姐咩?故事,是咁的。

先同大家介紹吓「一碟組合」花生女郎(PP Gals),話說歌手鄭敬基1991年揀咗4個少女組成花生女郎,成員包括蘇美欣、袁麗麗、陳雪燕,當然唔少得未選港姐嘅張可頤。成班青春少女著背心、吊帶唱歌,又點會吸引唔到男歌迷?不過嗰組合剩係出過一張唱片《DJ Boy》。之後點?短短一年就散band收場,據講同女仔爭風呷醋有關,又有傳聞話係唱片公司財政唔掂所致。

隔咗兩年,張可頤响1994年去選香港小姐,雖然無緣三甲,但都攞咗個最具演藝潛質獎,同屆冠軍係譚小環。張可頤之後簽約無綫,做咗合約演員,陸陸續續拍過《難兄難弟》、《九五至尊》、《金枝慾孽》等經典劇集,成為著名花旦之一。 話時話,依家張可頤英文名叫Maggie,大家又知唔知佢响花生女郎時代叫咩英文名?(貼士:T字開頭)

原圖嚟自網絡。