講到鴻門宴，估計無乜人會唔知道呢一餐飯充滿陷阱同殺機，食到人背脊骨落，不過大家又知唔知鴻門宴嘅導火線係咩呢？

呢餐飯源自沛公劉邦手下一個叫曹無傷嘅人，曹無傷係劉邦旗下嘅左司馬，《史記》對佢嘅描述少之又少。當初劉邦同項羽約定「先入關中者為王」，後尾劉邦先入關中，仲派兵守住函谷關。項羽率軍趕到咸陽果陣，見到大門緊閉，又得知劉邦已經平定咗關中，大怒。曹無傷知道項羽準備攻打劉邦，於是派人向項羽通風報信，諗住博取日後嘅封賞。曹無傷話沛公諗住於關中稱王，並任命秦朝最後一個君主子嬰為宰相，珍寶盡在佢手。

項羽得知消息之後梗係好嬲，諗住即刻出兵，首席幕僚范增就勸佢設下宴會，伺機殺死劉邦。就係咁，史上聞名嘅鴻門宴誕生。喺宴會上，項羽直接向劉邦爆料話係曹無傷告密，劉邦返去之後梗係唔會放過二五仔，最後曹無傷唔單止撈唔到好處，仲招嚟殺身之禍。

而鴻門宴另一個被認為係背叛者嘅人，係項羽嘅阿叔項伯。話說項伯同劉邦陣營嘅謀臣張良私交匪淺，項伯知道項羽嘅計劃，唔想張良受牽連，就一五一十咁講晒出嚟。同張良商量之後，劉邦拉攏項伯，並結下兒女婚姻。去到鴻門宴當日，項羽堂弟項莊以舞劍為名，企圖殺劉邦，項伯用身軀遮擋劉邦，令項莊無法落手。後嚟劉邦登基之後，項伯仲被封為侯。同喺二五仔，下場就相差咁遠，可見做二五仔都要搵啱投靠對象。

圖為電影《鴻門宴》嘅曹無傷同《楚漢驕雄》嘅項伯，原圖嚟自網絡。