過年期間無嘢做，唔覺意又打咗次《金庸群俠傳》，其中一本書《白馬嘯西風》係要走去高昌迷宮。咁話時話，高昌呢個地方到底係邊度呢？  如果以依家嘅地理劃分，高昌國嘅就係响依家中國新疆嘅吐魯番。不過，响古代中國歷史上呢個地方，一時受中原政權控制，一時就成為西域國家。中國古代文獻有關高昌地區嘅記載，就話漢武帝遺兵西討時，响車師前國屯田築城，由於呢個地方「地勢高敝，人庶昌盛」，因此得名高昌。而响公元五世紀至七世紀，呢個地區先後出現四個由漢人建立嘅王國，分別係闞氏高昌、張氏高昌、馬氏高昌同麴氏高昌。到咗唐朝，唐太宗派兵將高昌吞併設縣，但百幾年後到咗德宗時俾回鶻佔。到咗元朝時高昌被蒙古人佔領，到咗明朝就俾吐番吞併，高昌國亦自此消失。  响古代，高昌呢個地方位處天山南北孔道，係絲綢之路北路嘅衝要。由於政治穩定兼物產豐富，所以自古以嚟中西使節、商客同僧侶都會途經此地。講開僧侶，就唔可以唔提唐朝玄奘大師。當年唐玄奘取西經，去到高昌受到禮待，因為當時嘅高昌國王麴文泰信奉佛教，因此希望佢留响當地，不過玄奘決意西行。高昌王因敬重佢而無留難，仲俾咗廿四封信佢，呢啲信係高昌王請求路上24個國家對西行嘅玄奘好好照顧。有學者就話，由於玄奘係偷渡出境，所以呢廿幾封信可以話係保佢路上平安嘅「護照」。可惜嘅係，玄奘本來取完西經後想重返高昌，但途中得知高昌國已被滅。  講返轉頭，咁高昌古城係咪真係有迷宮呢？阿史有機會去嘅話再話俾大家知。