新年去八仙嶺行山鍛煉體魄，見到春風亭嗰時真係好感慨，因為它係紀念1996年2月10日八仙嶺大火中兩位捨己救人嘅老師。

當年香港中國婦女會馮堯敬紀念中學5個老師帶住49個學生去八仙嶺行山，期間懷疑有人食煙之後留低未熄嘅煙頭，導致火警。嗰日相對濕度唔夠30%，火勢迅速蔓延，落山條路被山火阻隔住，眾人唯有向山上逃生，當中有32人返到船灣郊野公園遊客中心求救。兩位老師周志齊同王秀媚就帶住另一批共16個學生逃生，但因為佢哋缺乏遠足經驗又唔熟路線，將學生帶到要爬過石壁先可以離開嘅「馬騮崖」。周sir同Ms Wong到生命最後一刻都盡老師嘅責任，幫助學生爬上崖逃生，結果兩人魂斷八仙嶺。

據講仲有4個學生就被行山人士救走，孭到去安全地方。而呢場大火足足燒咗40小時，一共造成5名師生死亡，13個學生受傷。政府為咗紀念周sir同Ms Wong捨己救人嘅行為同崇高精神，同年起咗呢座春風亭紀念佢哋。

原圖取自網絡。