呢排新聞成日都講野豬喺市區出沒、滋擾市民,阿史諗起喺上世紀初,香港就有多宗老虎出沒嘅紀錄,都咪話唔得人驚!

香港最早發現老虎嘅紀錄係响1911年,當時有隻老虎游水游到去大嶼山,咬死咗足足六、七十隻牛,當時軍警搜獵隊出動,反轉成個大嶼山都唔見有老虎,相信佢食飽之後游水走咗。到咗1912年,深水埗市區出現兩隻老虎,喺度橫衝直撞、見人就咬,據講係由馬戲團逃走出嚟,後來獵虎隊喺荒山上搵到虎穴,佢哋用火將呢兩隻老虎逼出嚟,跟手射死,之後啲人就將呢座山叫做「老虎岩」,之後政府要發展嗰區,就將個地方改名做「樂富」。

最轟動嘅一次就要數到1915年初,上水龍躍頭有村民發現有老虎出沒,當時歐籍沙展郭查同歐籍警員浩蘭到場調查,點知隻老虎就喺叢林裡面突然撲出嚟,抓傷郭查手臂,浩蘭就向老虎亂槍掃射,隻老虎最終走甩咗,而郭查受傷幾日之後喺醫院逝世。猛虎殺人,當局自然緊張,新界助理警察總監寶靈瀚組織咗40人嘅狩獵隊打老虎,追蹤一輪之後搵到隻老虎,並且包圍佢。呢個時候隻老虎突然咬落印籍警員屈頓星個頭,監生咬死對方,仲再次突圍逃去。狩獵隊於是搵埋英軍協助,包圍成個山頭,最後憑住強大嘅火力,將老虎射殺。

呢隻「上水之虎」鼻至臀長8呎6吋、尾長2呎6吋、高3呎4吋,相當大隻,射死之後佢嘅頭同皮都被製成標本,虎頭而家就放咗响警隊博物館收藏。

圖片為上水之虎及虎頭標本,取自網絡。