今日係情人節,最啱就係講返部經典愛情戲嚟應吓節。膾炙人口嘅愛情電影除咗《鐵達尼號》之外,仲有套《人鬼情未了》,戲入面唔少經典橋段都被好多愛情片模仿,絕對係經典中嘅經典。

有無人同阿史一樣,一諗起《人鬼情未了》,腦入面好自然就響起「Oh my love my darling~」嘅歌詞?無錯,呢首《Unchained Melody》簡直就係全套戲嘅點睛之作,呢首歌配上女主角狄美摩亞同男主角柏德烈史域斯一邊整陶瓷一邊kiss嘅場面,絕對係史上最浪漫電影橋段,連九十年代套《家有囍事》嘅周星馳同張曼玉都曾經惡搞依幕。

陽光大隻嘅柏德烈同短髮索爆嘅狄美摩亞,共同演繹嘅呢個甜蜜之中又帶住無奈、心痛嘅悲劇愛情故事,當年全球票房總收入達5億美元。柏德烈自己睇劇本果陣都不由得被感動,搞到佢喊咗四、五次。戲入面呢對苦命鴛鴦因為被奸人所害,搞到從此陰陽永隔。柏德烈死咗之後,一直無離開過狄美摩亞,默默守護住佢。最令阿史感動嘅一幕係,狄美摩亞明明睇唔到柏德烈嘅靈魂,柏德烈就用一粒銀仔嚟證明佢嘅存在,狄美摩亞睇住粒銀仔慢慢郁,眼淚就流咗出嚟,果下真係令阿史有啲心疼呢對情侶。

雖然《人鬼情未了》個結局係有啲令人遺憾,不過始終都係戲,大家睇完喊過就算喇。最後阿史祝各位有情人都可以更加珍惜對方,繼續甜甜蜜蜜,而單身人士就爭取出年唔再自己一個過情人節喇。

原圖嚟自網絡。