近排無意中聽返一首小虎隊嘅歌:「哪吒不怕海龍王,幼獅不畏虎和狼~」仲有無人記得呢?唔好以為呢首係古裝劇、神話劇嘅主題曲呀,其實佢係電視劇《新紮師兄》嘅主題曲。

提起《新紮師兄》,又點少得講講偉仔梁朝偉。TVB喺1984年拍《新紮師兄》第一部嘅時候,梁朝偉仲係小鮮肉一名,但演技已經相當標青,佢飾演嘅張偉杰有正義感又有小小大細路,再孖住fit佬劉青雲、張曼玉、劉嘉玲、關禮傑、呂方等一眾好戲之人,演繹咗一部以少年警察訓練學校為主題嘅青春勵志劇。呢部劇當年喺香港首播果陣已經引起巨大迴響,平均每集收視成50點,大大改變咗好多市民對警察嘅負面觀感,亦都令當時投考警察嘅人數大增。梁朝偉同劉青雲兩大影帝強強聯手,經典程度宜家仲為人所津津樂道,而佢哋兩個亦都因此劇而備受賞識,分別踏上各自嘅影帝之路。

由於收視實在太好,《新紮師兄》好評如潮,TVB隨後再開拍《新紮師兄續集》同埋《新紮師兄1988》,而後嚟嘅《學警雄心》系列電視劇,就係以《新紮師兄》為創作基礎。雖然《新紮師兄續集》有發哥周潤發、曾華倩、戚美珍、任達華等強勢加盟,劇中角色增加,人物嘅性格更突出,但收視同口碑都不如第一部。至於喺《新紮師兄1988》入面,當初陽光又正氣嘅偉仔升咗做總督察之後,好似成個人唔同晒咁,開口埋口都係:「信唔信我一槍打爆你個頭!」暴戾形象同之前兩套劇嘅勵志形象完全唔同,阿史都係中意第一部嘅偉仔多啲囉。

圖為三部《新紮師兄》劇照,原圖嚟自網絡。